Kusolwa esemfene ngokwebiwa kwemali kunogada

Johannesburg - Isehlakalo sokwebiwa kwebhokisi lemali kunoga enxanxatheleni yezitolo eRosettenville, eningizimu yegoli, okwashona kusona iphoyisa lakwamasipala, kungenzeka ukuba sasihlelwe nguyena unogada. 

I-video esisabalale kuFacebook, iveza unogada engena esitolo sasePick n Pay ephethe ibhokisi lemali.

Lo nogada obonakala elandelwa wumlisa ohamba ngenduku ngesikhathi esephuma esitolo, ngemuva kwalokhu unogada wama.

Kube sekuqhamuka umlisa wesibili oqonde ngqo kunogada wabe esekhipha into esabhodlela ayithele ebhokisini lemali.

Funda nalolu daba: Abathi vu ngolukaPhiyeka

Ngaleso sikhathi unogada ubonakale ezimele nje futhi engakhathazekile.

Iphoyisa likamasipala, elaliza ngasesitolo, lakubona okwakwenzeka labe selizama ukukhipha isibhamu kodwa lahlaselwa wumlisa owayehamba ngenduku.

Ngemuva kokuhilizisana nabasolwa ababili, iphoyisa libonakala seliwela phansi ngemuva kwalokho abasolwa bahamba.

Izigebengu zahamba nebhokisi lemali, kodwa kwaqhunyiswa u-inki ngokuhamba kwesikhathi ukuze imali bangakwazi ukuyisebenzisa.