Durban - Iphoyisa elingumseshi lasePinetown liyasoleka ekubulaweni kukasomabhizinisi waseThekwini, kanti kumanje kuthiwa ligcwele amathafa.
Sekujutshwe ithimba lamaphoyisa ukuthi kuthungathwe leli phoyisa, elingeke likhishwe igama lalo kuze kube kuphuma incwadi egunyaza ukuboshwa kwalo.
Lo ufunwa ngezinsolo zokuthi uyathinteka ekubulaweni kukaNalini Naidoo, owatholakala eshonile enqunywe uqhoqhoqho ngaseShongweni Dam, eNkwalini, ngo-Okthoba wonyaka ophelile.
OLUNYE UDABA: Kuboshwe iphoyisa ngokubamba inkunzi
Okhulumela amaphoyisa uColonel Jay Naicker ukuqinisekisile ukuthi kufunwa leli phoyisa.
“Ngeke sibubekezelele ubugebengu ngaphakathi emaphoyiseni. Amalungu asolekayo ebugebengwini azoboshwa bese ebhekana nengalo yomthetho," esho.
Umyeni kaNaidu, uSeelan, owayeyiphoyisa, useke wavela eNkantolo yeMantshi yaseThekwini, njengoba esolwa ngokuba ngungqondongqondo ekubulaweni kukankosikazi wakhe.