Liyehla isasasa ngelika-Oscar

Pretioria - Umphakathi ubukeka usuwehlelwe yisasasa ngecala lomsubathi ogijima ngamaxhumela, u-Oscar Pistorius, njengoba kubonakale idlanzana labantu ebelindele ukumbona ngaphandle kweNkantolo eNkulu ePitoli.

NgoLwesibi ngesikhathi uPistorius ebuyela ebhokisini, abantu bebephume ngothi lwabo bezozibonela ukusuka nokuhlala.

Ekuqhubekeni kwecala ngoLwesithathu, ummangalelwa ungene egqoke isudi emnyama, wabonakala edlana indlebe nabameli bakhe.

UPistorius ubhekene necala lokudubula abulale intombi yakhe uReeva Steenkamp,  amdubulela emzini wakhe mhlaka-14 Febhuwari, nyakenye.

USteenkamp wadutshulwa emi ngemuva kwesicabha sasethoyilethe, ummangalelwa uthi wayecabanga ukuthi umgqekezi.

UMbuso uyakuphikisa ukusho kukaPistorius, uthi lezi zithandana zaba negxabano, uPistorius wagcina ngokuthi adubule.

Ekuqaleni kwenkantolo, iJaji uThokozile Masipa, uvume isicelo sokuthi icala lihlehliswe isikhathi esingamasonto amabili.

Ngemuva kwangoLwesine, inkantolo izoma ize iqhubeke mhlaka-5 Meyi.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).