'Nomahosha angasivala isikhala sikaZuma'

Johannesburg - Uphiko lwabesifazane kwi-African National Congress luthi luzoqhubeka nokulwela ukuthi iNingizimu Afrika ibe nomengameli wesifazane, noma ngabe lokhu kuchaza ukuthi baqoka umahosha kulesi sikhundla.

Ngokubika kweThe Citizen i-ANC Womens League ihlela ukulidlulisela lolu daba kwingqungquthela yamalungu ayo esigungu esiphezulu ezoqala kusasa ngoLwesithathu eMidrand eGauteng.  

Umengameli walolu phiko uBathabile Dlamini obuye abe nguNgqongqoshe wezokuThuthukiswa komphakathi uthe lolu phiko luzolwela u-50/50 kuzozonke izinhlaka ze-ANC.

"Sifuna ukubona ushintsho oluzothuthukisa abesifazane kube nokulingana kwezikhundla," kusho uDlamini.

OLUNYE UDABA: Ushonile osokwe esikoleni esingekho emthethweni

Lo mholi walolu phiko uthe i-ANC ayinankinga nokuqoka umahosha njengomholi wayo.

"I-ANC ayikaze ibe nenkinga nokuqoka umuntu ongumahosha.

Uma ujoyina le nhlangano awubuzwa ukuthi ungumahosha ngakho ngeke ube sezinhlakeni ze-ANC.

Uma kungenziwa njalo kungakhombisa ukucwasa,"kusho uDlamini.

"Sifuna nabesifazane babe ngoNdunankulu bezifundazwe futhi babe ngoSihlalo benhlangano ezifundazweni."

 USihlalo we-African Union Commission uNkosazana Dlamini Zuma ungomunye wababhekiwe esikhundleni sokungena ezicathulweni zikaMengameli Jacob Zuma njengomengameli we-ANC ngo-2017 ngaphambi kokhetho lukazwelonke ngo-2019.

UDlamini uthe sesifikile isikhathi sokuthi izinhlaka ze-ANC ziqale zidingide ubuholi obulandelayo bale nhangano njengoba enanele ngokuthi abesifazane kumele babe yingxenye yezingxoxo zobuholi.   

    - “Like” ikhasi lethu kuFacebook ukuze uthole izindaba ngolimi lwakho

    - Landela IzindabaNews24 kuTwitter