Johannesburg – Umfelokazi kaChris Hani uLimpho akakasamukeli isimemo sikaClive Derby-Lewis sokuthi amvakashele esibhedlela ukuze akwazi ukuxolisa ngendima ayidlala ekubulaweni kwaleli qhawe lomzabalazo.
Lokhu kudalulwe ummeli kwaDerby-Lewis ngoLwesine ukuthi uLimpho akakaphenduli ngalesi simemo esenziwe ikilayenti lakhe elugulela ukufa esibhedlela njengoba lihaqwe yisifo somdlavuza.
“Cha, ayikaqhamuki impendulo,” kusho lo mmeli uJulian Knight.
OLUNYE UDABA: Ugwetshiwe owesifazane olahlwe ngelokudlwengula umshana
NgoMsombuluko abameli bakaDerby-Lewis bafaka isicelo sokubuyekeza isinqumo sikaNgqongqoshe wezoBulingiswa nokuHlunyeleliswa kweziMilo uMichael Masutha sokunqabela ikilayente labo ushwele ngomhlaka 30 kuJanuwari.
Ezinye zezizathu ezabekwa ungqongqoshe ngesikhathi echitha isicelo sikashwele sikaDerby-Lewis ukuthi akakaze akhombise ukuzisola ngesenzo sakhe kodwa lesi sizathu sachithwa ngabameli abahambisa umqulu kwiJaji Selby Baqwa owawuchaza ukuthi uDerby Lewis useyindoda eshintshile.
Omunye ummeli kaDerby-Lewis uRoelof du Plessis umeme uumfelokazi kaHani ukuba avakashele lesi siboshwa esibhedlela i-Eugene Marais ePitoli lapho elashelwa khona ngomdlavuza wephaphu.
UDu Plessis uthe uDerby-Lewis ufuna ukuvakashelwa umfelokazi kaHani ukuze akwazi ukuxolisa ubuso nobuso.
- “Like” ikhasi lethu kuFacebook ukuze uthole izindaba ngolimi lwakho