Emva kokubona ukwenzelela kwengalo yomthetho kwabanye abantu abasuke benamacala abucayi, umbhali osemnkantshubomvu waseMgungundlomvu uMnu Mbongeni Ngcobo usekhiphe incwadi esihloko esithi ‘Hawu Ngempela’ ekhuza lo mhlola.
UNOKULUNGA NGOBESE uxoxisane naye.
UNGCOBO ongowokudabuka esigodini sakwaShange endaweni yangaphezulu uthi ngale ncwadi uhlose ukukhuza umkhuba indlela umthetho osekubukeka ngayo njengento esivikela izigebengu, njengoba ezinye zidedelewa yize kukhona ubufakazi obuqandula ikhanda.
Le ncwadi ikhuluma ngezigebengu eziyishumi ezisebenzisana ndawonye (syndicate) esezibaqedile abantu ngokugqekeza, ukubulala, ukudlwengula nokukhwabanisa amakhadi asebhange.
Yize icala lazo liqalwe ukuqulwa eNkantolo enkulu yaseMgungundlovu, lagcina seliphelela eBloemfontein.
Ziyadedelwa phezu kobufakazi obuqandula ikhanda.
Ekhuluma nephephandaba i-Echo uNgcobo uthe:
“Ngalesi sihloko esithi ‘Hawu ngempela’, ngikhombisa ukumangala kwami nokungakholwa ukuthi lezi zigilamkhuba zitholakale zingenacala.
“Inhloso enkulu ukuthi ngifuna umthetho ubuyise isithunzi sawo.
Ngibona sengathi umthetho walapha eNingizimu Afrika usuyenzelela.
OLUNYE UDABA:Iqale ngezidumbu impelasonto yobumnandi eKZN
Sekukaningi kudedelwa abantu abanamacala abucayi ngoba kuthiwa ubufakazi abanele
“Abantu uma bengathembele engalweni yomthetho, bazothembela kuphi?
Ngifuna ukukhuza umhlola ukuthi ingalo yomthetho ayiqine.
“Kunemiphakathi esihlale ihlalele ovalweni ngenxa yemigulukudu ekhishwa emajele yize inamacala.”
UNgcobo okuyincwadi yakhe yeshumi nane lena uthe ziningi izifundo afisa zitholwe abafundi ngale ncwadi.
“Okukuqala nje abafundi bazofunda nangokubaluleka kokuhlonipha amalungelo abanye abantu.
Bazofunda nokuthi isikhathi esiningi ubugebengu lobu obudlangile emiphakathini yethu budalwa ukuvilapha kwabantu, abafuna imali esheshayo.
“Ziningi izinto abantu abangazenzela zona ukuze baxoshe ikati eziko esikhundleni sobugebengu.
Ekugcineni kwakho konke ngiphonsa inselelo kuhulumeni wethu ukuthi ake abhekisise ukusebenza kwezinkantolo abuyise isithunzi sezinkantolo, njengoba eminingi imiphakathi isikhetha ukuzibambela ngezandla ngenxa yokuphelelwa ithemba kwingalo yomthetho,” kusho yena.
Le ncwadi isiyatholakala kwa Adams andamp; Griggs Booksellers
- “Like” ikhasi lethu kuFacebook ukuze uthole izindaba ngolimi lwakho