Owesifazane owadlwengulwa ufuna u-R10,6m emaphoyiseni

Pretoria – Owesifazane owagwazwa amahlandla angu-22 waphinde wadlwengulwa ngumalugaju, usefakele amaphoyisa isimangalo efuna ukukhokhelwa u-R10.6 million ngamademeshe, ngoba amaphoyisa ehluleka ukwenza umsebenzi wawo wokuvikela umphakathi.

Lona wesifazane, emaphepheni awafake eNkantolo eNkulu eNorth Gauteng, uthi wayengeke adlwengulwe ukuba uMbuso wawumvalelile uSamuel Tsietsi Msiza owayengaphandle ngebheyili ngamanye amacala.

UMsiza wayebhekene nohide lwamacala, okubalwa kuwona nelokudlwengula owesifazane ngo-Okthoba 2011 eSinovill.

Ngeledlule, uMsiza wagwetshwa yinkantolo udilikajele, kanye neminyaka engu-40 ngaphezulu ngesihluku abanaso ngesikhathi ehlasela umfundi waseTuks, oseneminyaka engu-24 ubudala manje.

Kuvele ukuthi uMsiza wayenamacala kusukela kudala, ayengazange abhekane nawo noma uMbuso ongazange uwalandelele.

Usolwa ngamacala amaningi okudlwenula izingane kanye nokwenza ucansi nezidumbu zabantu okuthiwa wayebabulalile.

UMsiza kwakulindeleke avele eNkantolo eNkulu eMafikeng ngecala lokuhlasela, kodwa uMbuso wawahoxisa amacala, kubike iPretoria News.

Lona wesifazane usola amaphoyisa neNPA ngokungawenzi umsebenzi wabo ngokuthi babekele inkantolo izizathu eziqinile zokuba uMsiza anganikwa ibheyili kanye nokungawalandeleli amanye amacala akhe aphambilini. 

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).