Sesifinyelele ku-14 isibalo sabashonele ekusokeni

Durban – Sesinyuke safinyelela ku-14 isibalo sabasokwa asebeshonile e-Eastern Cape kusukela kuqale ubusika ngokusho koMnyango wezeMpilo kulesi sifundazwe.

Okhulumela lo mnyango uSizwe Kupela uthe ngoMgqibelo ntambama bese bengu-14 abasokwa abashonile njengoba ngoLwesihlanu ntambama isibalo besingu-10.

Abafana abahlanu bebengabaseNyandeni, abane kungabaseMhlonhlo bese kuba noyedwa kulezi zindawo iQaukeni, eChris Hani, Amathole nase-Alfred Nzo.

UKupelo uthe abahlanu kulaba basokwa bebesezikoleni ezisemthethweni zokwesokwa kanti abanye bebeqhamuka kulezo ezingekho emthethweni.

OLUNYE UDABA: Kuboshwe abokufika ngokugoloza ukuphuma enkambini

Laba bafana bebeyingxenye yenqwaba yabafana abaphuthunyiswe ezibhedlela ngemuva kokuhlangabezana nezinkinga ezahlukene zezempilo ngemuva kokwesokwa.

NgoLwesine uKupelo uthe isibhedlela iSt Barnabas esiseLebode e-Eastern Cape besibhekene nengcindeze ngenxa yokwanda kwabafana abahlangabezane nezinkinga ezikoleni zokusokwa.

Kubikwa ukuthi sebebonke abasokwa abangeniswe esibhedlela babalelwa ku-36 kanti lesi sibhedlela bese siqala nokushodelwa yimibhede yokulalisa iziguli ngenxa yokugcwala.

       - “Like” ikhasi lethu kuFacebook ukuze uthole izindaba ngolimi lwakho

           - Landela IzindabaNews24 kuTwitter