Durban – Amaphoyisa asevulele ngezinhlamvu zenjoloba kubafundi ababhikishayo eMangosuthu University of Technology (MUT), eThekwini, ngoLwesibili.
Iqulu labafundi abalinganiselwa ku-200 bajikijele amaphoyisa ngamatshe, izitini kanye namabhodlela besebenzisa izingqwembe njengamahawu ukuzivikela.
Ngaphambilini, onogada badubule ngazibhamu zikapende bezama ukuhlakaza lo mbhikisho.
Abafundi bashise isihlahla kwaphinde kwavela nokuthi kukhona abankanise ezindaweni ezihlala abafundi ngaphakathi.
Abanye bababhikishi bebezifihle ngezigqoko bemboze ubuso becula namaculo omzabalazo.
Le mibhikisho iphinde yaqubuka ngoLwesibili kule nyuvesi ngemuva kokuqala ukufunda nokufundisa, isikhungo siqashwe ngamaphoyisa.
Kumisiwe ukufunda ngoMsombuluko kulandela umbhikisho wabafundi abakweleta inyuvesi nabafuna nokubhaliswa ngenkani.
Okhulumela inyuvesi uLen Mzimela uthe: "Kwenziwe isivumelwano nabafundi abakweleta imali engaphezu kuka-R10 000 sokuthi bazobhaliswa uma kungaxoxiswana mayelana nezimali ezingakakhokhwa."
Ababhikishayo ilabo abanqabile ukuba kuxoxiswane.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter