Sinobufakazi obuqinile bokushushisa ababulali - NPA

Johannesburg – Abalisa abane abasolwa ngokubulala owesilisa waseMozambique u-Emmanuel Sithole ngoMgqibelo bavele kafushane eNkantolo yesiFunda yase-Alexandra ngoLwesibili.  

USizwe Bhengu, Sizwe Mngomezulu, Ayanda Sibiya noSifundo Mzimela bangabasolwa abaqavile kuleli cala elishaqise abaningi ngemuva kokusabalala kwezithombe zalesi sigameko ezinkundleni zokuxhumana nasemaphephandabeni ngeSonto.

Ngesikhathi bevela enkantolo ngoLwesibili ababuzwanga ukuthi bayalivuma noma bayaliphika leli cala elihlehliselwe umhlaka-4 kuMeyi kanti basazoqhubeka nokugcinwa ezikhindini.

Inkantolo ibigcwele phama abantu bezozibonela la madoda asolwa ngokubulala ngesihluku lo mlisa esigamekweni okusolakala udlame olubhekiswe kwabokufika.

OLUNYE UDABA: Usindile owesifazane ogwazwe amanxeba angu-16

Isihlobo sika-Emmanuel uThando Sithole uthe iyodwa nje into engakhulula umndeni wukuthi ingalo yomthetho idlale indawo yayo.

Ngokubika kweSowetanlive enkantolo bekukhona noNdunankulu waseGauteng uDavid Makhura neNhloko yezokuShushiswa koMphakathi kuleli uMxolisi Nxasana othe leli yicala okumele libekwe eqhulwini lamacala.

Uthe i-National Prosecution Authority inobufakazi obanele bokushushisa laba basolwa.

“Ubufakazi esesibuqoqile kwidokodo banele ukuthi ukuthi singabashushisa.  Kulobu bufakazi asithembele kobentatheli ethathe izithombe,” esho.

Kulindeleke ukuthi bafake isicelo sebheyili ngomhlaka-4 kuMeyi 2015.

     - “Like” ikhasi lethu kuFacebook ukuze uthole izindaba ngolimi lwakho

       - Landela IzindabaNews24 kuTwitter