Johannesburg – Ngemuva kwesonto kufuniselwa, uMmusi Maimane usekwamukelile ukuphakanyiswa kwegama lakhe ohlwini lwabazohola iqembu iDemocratic Alliance.
UMaimane uthe ukwamukela lesi siphakamiso kuchaza ukuthi lokhu kuzobe kuyithuba “lokuvuselela ithemba” ngekusasa laleli lizwe.
“Akuzange kube yisinqumo esilula,” esho kwisitatimende esikhishwe yileli qembu ngoMgqibelo ekuseni.
“Sengicabangile ngokwanele ngokuthi lokhu kuchaza ukuthini emndenini wami futhi bekumele ngibheke nesikhathi ukuthi kungabe sesilungile yini.
OLUNYE UDABA: Usethi khumu ekuholeni i-DA uZille
Ekugcineni ngithathe isinqumo sokwamukela ukuphakanyiswa kwegama lami ngoba yithuba elihle lokuvuselela ithemba ngekisasa leNingizimu Afrika,” esho.
Lokhu kuqhamuka ngemuva kokuba umholi waleli qembu uHelen Zille ezwakalise ukuthi ngeke esaqhubeka nokuhola ngemuva kwehlandla lakhe.
Sekuphele cishe isikhathi esingangesonto kunamahlebezi ngokuthi uMaimane uzokwamukela ukuphakanyiswa kwegama lakhe kulesi sikhundla.
Khona manjalo KwaZulu Natal uZwakele Mncwango noSizwe Mchunu bagaqele ukuhola leli qembu kulesi sifundazwe.
- “Like” ikhasi lethu kuFacebook ukuze uthole izindaba ngolimi lwakho