Publications
Partners
Johannesburg - USomlomo wePhalamende uBaleka Mbete usephinde wexwayisa amalungu e-Economic Freedom Fighters ukuthi ngeke asibekezelele isiphithiphithi kulesi sikhungo, kepha ethe engakawagwinyi lawo mazwi kwangenelela uSotswebhu we-EFF uFloyd Shivambu wathi uMbete ukhetha iphela emasini.
"Uma imithetho ingahlonishwa lokho kuchaza ukuthi kukhona abantu abafuna ukudala uthuthuva,” kusho uMbete.
"Ngeke ngize ngikwazi ukubekezelela ukuphazanyiswa kokusebenza kwePhalamende,” esho, ngemuva kokuqinisekisa ukuthi ngeke asithathe isinqumo sokuthi kumiswe amalungu angu-20 e-EFF, wathi lokho kusezandleni lekomidi elibhekelele ukuziphatha kwamalungu ePhalamende.
UMbete ushintshe umqondo ngemuva kokuthi i-EFF isabise ngokubabela enkantolo ngalolu daba.
Amalungu e-EFF abebhekene necala lokungaziphathi kahle ngesikhathi uMengameli Jacob Zuma ephendula imibuzo ePhalamende.
La malunga adala uthuthuva ngesikhathi esola umengameli ngokungawuphenduli umbuzo othi uzoyibuyisa nini imali eyasetshenziswa kuthuthukisa umuzi wakhe oseNkandla.
- “Like” ikhasi lethu kuFacebook ukuze uthole izindaba ngolimi lwakho
