Cape Town – UMengameli Zuma utshele iPhalamende ukuthi uzowukhipha ngenyanga ezayo umbiko weKhomishini kaFarlam wesigameko saseMarikana.
UZuma ukusho lokhu ngesikhathi kunenkulumo mpikiswano yesabelo mali yehhovisi lakhe njengoba iqhubeka nokwanda ingcindezi yokuthu uMengameli adedele lo mbiko.
Amalungu emindeni yabantu abaphangalala ngosuku lwesigameko saseMarikana basabise umengameli ngokumthathela izinyathelo zomthetho ngokuthi asheshe awukhiphe lo mbiko.
OLUNYE UDABA: Kuboshwe 8 ngokuduna iloli likagwayi eGoli
Kuzokhumbuleka ukuthi ngosuku lwesigameko saseMarikana amaphoyisa adubula abulala abavukuzi abangu-34.
UZuma uthe: “Ngiyakuqonda ukuthi abantu abathintekayo ngalesi sigameko sebekulangazelele ukuphuma kwalo mbiko kodwa kubalulekile ukuthi ngiqale ngiwucubungule ukuze ngithathe izinqumo ezifanele ngaphandle kokutatazele.
Lo mbiko ngizowukhipha ngaphambi kokuthi kuphele inyanga ezayo.”
UZuma ubonge kakhulu iJaji Ian Farlam ngokuhola le khomishini.
- “Like” ikhasi lethu kuFacebook ukuze uthole izindaba ngolimi lwakho