Ufakazi ushayisana nokushiwo ngu-Oscar

Johannesburg - Ufakazi owethula ubufakazi obuvuna ummangalelwa ushayisane nobufakazi obethulwa ngumsubathi wakuleli u-Oscar Pistorius kuleli cala lokubulala.

Ethula ubufakazi bakhe eNkantolo eNkulu ePitoli, uRoger Dixon uthe ngokwemiphumela yakhe ishalofu elihlala amaphephabhuku laliseceleni kwalapho uReeva Steenkamp awela khona washona ngosuku lwezithandani ngonyaka odlule.

Ukhombise inkantolo izithombe wathi kunegazi okubonakalayo kuzona ukuthi ladalwa ukugudluzwa kweshalofu endlini encane ekhaya likaPistorius.

Kodwa uPistorius watshela inkantolo ukuthi leli shalofu lalingekho kuleyo ndawo ngesikhathi engena endlini encane ethatha uSteenkamp.

"Usho ukuthi umsolwa wayebheda? kubuza umshushisi uGerrie Nel. "Wena ungufakazi wakhe," kusho uNel.

"Ngesikhathi umufi ewela phansi, ishalofu lamaphephabhuku lalilaphayana," kusho uDixon, ogogode ezifundweni zokuba yi-geologist.

Umama kaSteenkamp, uJune, ubheke phansi egwema ukubuka izithombe.

UPistorius wadubula uSteenkamp esendlini encane emzini wakhe ePitoli ngeValentine's Day ngonyaka odlule.

Uthi wayecabanga ukuthi yisigebengu futhi wadubula ngephutha.

 

 - “Like” ikhasi lethu kuFacebook ukuze uthole izindaba ngolimi lwakho

 - Landela IzindabaNews24 kuTwitter