Tongaat – UMbali Zungu, 25, uthi awuzange umfikele umcabango wokuthi amadoda angena egumbini lakhe ephethe imimese emide ayezobulala indodakazi yakhe, 7.
UZungu, ukholelwa ekutheni ubaba wengane yakhe, uThokozani Ngidi, nguye owathumela la madoda kubo eNsuze, ngaphandle kwasoThongathi, ukuba azosoconga indodakazi yabo uPhiliswa.
Ngemuva kwemizuzu emihlanu, umakhelwane wabe esethola isidumbu sikaPhiliswa, sinamanxeba angu-40 okugwazwa, edatshulwe isisu wakhishwa amathumbu noqhoqhoqho unqunyiwe.
OLUNYE UDABA: Ugwetshiwe owabulala ingane ‘ethengwe yiphoyisa’
“Ngathi uma ngisondela esidunjini ngawabona amathumbu ehlezi ngaphandle ngenxa yokugwazwa esiswini. Intamo yakhe yayigcwele igazi inenxeba elikhulu.”
Kuthiwa ababulali bafika okokuqala babuza ukuthi ngubani oneloli ethutha isihlabathi.
Babe sebebuya okwesibili babuza ukuthi ngubani indodakazi kaNgidi.
“UPhilisiwe wabe esethi nguye ingane kaNgidi, bamyabula bahamba naye bathi ngeke bamlimaze. Sashaqeka sesimthola eshonile.”
UZungu uthi akakungabazi ukuthi uNgidi, oyiphoyisa, nguye owabulala indodakazi yabo ngoba wayefuna ukumphuca yona.