Nelspruit – Owesilisa osolwa ngokudlwengula eMpumalanga utshele inkantolo yeMantshi yaseTonga ukuthi iyamnyanyisa.
Kuthiwa lona wesiliswa okukholwakala ukuthi ikhanda lakhe alithathi kahle ukusho lokhu ngoMsombuluko ngesikhathi evela phambi kweMantshi uHazel Khoza.
Umbiko uthi uFanie Ndlovu oneminyaka engu-23 ubudala waseMangweni uliphikisile icala lokudlwengulwa asolwa ngalo.
Kuthiwa uNdlovu usho ngolaka ukuthi: “Angihlanyi mina,” ngesikhathi esebhokisini labasolwa ekhomba imantshi.
Uqhube wathi: “Uyanginyanyisa wena”.
Abantu abebethamele leli cala bazwakale beqhuma phezulu wuhleko ngaleso sikhathi imantshi uKhoza ikuzibile lokhu yamtshela ukuthi uzophindeselwa esebhedlela sabangaphilile engqondweni iWeskoppies ukuze aqhubeke nokuhlolwa isimo sakhe.
Kuthe kusenjalo wazwakala esencenga imantshi.
“Ngiyacela Mhlonishwa sengifuna ukushintsha ngilivume icala manje.
"Sengikhathele uwena ulokhu ungibuyisela esibhedlela iWeskoppies, sengifuna ukugoduka ngiye ekhaya,” esho ememeza.
Icala likaNdlovu lihlehliselwe umhlaka-1 Okthoba lapho imantshi izophinde ibheke nemiphumela yesimo sengqondo yakhe.
UNdlovu selokhu aboshwa ngomhlaka-8 Novemba kanti ubegcinwe kulesi sibhedlela.
- “Like” ikhasi lethu kuFacebook ukuze uthole izindaba ngolimi lwakho