Publications
Partners
Johannesburg - UNdunankulu waKwaZulu-Natal uSenzo Mchunu, kumele akhiphe ehhovisi unkosikazi wakhe osebenza njengeMeya emkhandlwini wasoThungulu, kusho iNkatha Freedom Party ngoLwesithathu.
"Uma undunankulu ezimisele ngokukhombisa ukuthi usebenza njengomholi oqotho, kumele abe yisibonelo akhiphe unkosikazi wakhe ekubeni yimeya," kusho ilungu lesiShayamthetho kwi-IFP uBlessed Gwala.
UGwala uthi unkosikazi kandunankulu uThembeka Mchunu, akasebenzi ngokugcwele emsebenzini ekumele engabe uyawenza, wathi uncelisa amawele.
Umsebenzi wamakhosikazi ezikhulu zikahulumeni, ukuqinisekisa ukuthi aba sehhovisi elibhekele umsebenzi wabayeni babo, kusho uGwala othi useke waluphakamisa lolu daba.
"USenzo Mchunu akaze alusukumele lolu daba olubhekene nesithandwa sakhe. Siyazi ukuthi ukube bekuyi-IFP, ngabe kade bakhuluma ngalolu daba."
UGwala uthi mkhulu umsebenzi ekumele wenziwe ehhovisi labashadikazi kanjalo nasehhovisi lobumeya.
Funda nalolu daba: i-DA ikhala ngoMchunu e-KZN
UNobhala Jikelele we-African National Congress uSihle Zikalala, uthi iqembu selike lahlanganisa amakhanda ngalolu daba.
"Udaba lwezikhundla ezibanjwe nguThembeka Mchunu kuke kwakhulunywa ngalo enkomfeni ebanjwe esifundeni iMusa Dladla," kusho uZikalala.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.
