Johannesburg - Utholakale engenamyocu umfundi wase-University of Johannesburg, obethunjwe ophikweni lwenyuvesi oluseSoweto, kusho umbiko wamaphoyisa aseGauteng.
Umfundi uthunjwe kwasekushayelwa abazali bakhe, kuythiwa abakhiphe isamba semali engu-R3 million, kuze ezodedelwa, kusho okhulumela amaphoyisa uWarrant Officer Kay Makhubela.
Abazali bazikhalele bathi abanayo imali, abathumbi bayehlisela ku-R1m, baphinde bayehlisela ku-R500 000.
Abazali bagcine bengakhiphanga mali.
Onogada basenyuvesi bathole umfundi ehamba endaweni evulekile, base bemthuthela esikhungweni.
Umfundi utshele amaphoyisa ukuthi abathumbi bamsabise bathi bazombulala.
"Kuthathwe isikhwama sakhe samali ebesinamakhadi asebhange. Ngokusho komfundi ayikho imali ekhishiwe ekhadini lakhe," kusho uMakhubela othi kuvulwe icala lokuthumba.
Kuyacelwa ongaba nolwazi abikele amaphoyisa.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.