Isinqumo sokuqhubeka naleli cala siza ngemuva kwesicelo esifakwe ngummeli walo mfundi sokuthi leli cala lingathethelwa enkantolo, nesiphikisiwe yiNational Director of Public Prosecutions (NDPP).
U-Advocate William Karam wafaka isicelo kuMqondisi wezokuShushiswa koMphakathi ukuba ikhasimende lakhe lifakwe ngaphansi kohlelo lwabantu abasha abasuke besolwa ngamacala athile, kunokuthi lishushiswe enkantolo.
Lesi sicelo saphetshezwa, uKaram waphinde wafaka isicelo sokuphikisa isinqumo, naso sabhuntsha futhi.
"Ngidangele kakhulu ngoba uma ubuka izinto ezaholela ekutheni kuze kube khona ophunyelwa umphefumulo, ummangalelwa wayemncane kanti umufi yena wayevele ewuhlupho futhi lokho kwaziwa,” kusho uKaram etshela leli phephandaba.
Ummangalelwa kusolakala ukuthi wathatha isibhamu sikamama wakhe somsebenzi waya naso esikoleni, nalapho afike khona wangqokloza umufi ekhanda ngaso.
Kuthiwa umufi wayehlezi njalo enyuka ummangalelwa.
- “Like” ikhasi lethu kuFacebook ukuze uthole izindaba ngolimi lwakho