Zilikhalele iphoyisa ngelokubulala

Cape Town - Iphoyisa likhalelwe ngamasongo kaSigonyela ngezinsolo zokudubula libulale owesilisa eMitchells Plain, kusho i-Independent Police Investigative Directorate (Ipid) ngoLwesibili.

Okhulumela i-Ipid uMoses Dlamini uthe leli phoyisa, 34, ligaxwe ozankosi liseKapa ngoMsombuluko ebusuku.

Uthe kusolakala ukuthi uSharief Bester, 34, nomngani wakhe babemi ngasesangweni ngezintatha zangoMsombuluko ngesikhathi kuqhamuka imoto yamaphoyisa yayoma ngakubona.

Laba base beseshwa, umngani kaBester wadedelwa.

UDlamini uthe amaphoyisa awazange athole lutho kuBester kepha afuna ukumbopha wase edaza inkani.

"Kusolakala ukuthi umufi wabe esefuthwa nge-pepper spray wase ededelwa kwathiwa akabaleke," kulandisa uDlamini.

"Wathi eseqala ebaleka, wadutshulwa kanye emhlane waphelela khona endaweni yesehlakalo."

Iphoyisa leli lizovela eNkantolo yeMantshi yaseMitchells Plain ngoLwesine.

 - “Like” ikhasi lethu kuFacebook ukuze uthole izindaba ngolimi lwakho

 - Landela IzindabaNews24 kuTwitter