Pretoria – Umfundisi wasePitoli owaqubula umsindo ngokudlisa abazalwane bakhe izilwane, okubalwa kuzo nenyoka, uPenuel Mnguni, uvele ngaphambi kweReligious and Linguistic Rights Commission.
UMnguni, 24, unikezwe ithuba lokuchaza ukuthi kungani edlisa abazalwane bakhe amagundane, izinyoka namatsheketshe.
“Akekho owashona ngemuva kokudla izinyoka namatsheketshe. Abazalwane bathi inyoka yayinambitheka njengoshokoledi. UNkulunkulu wasinika amandla okuphendula noma ngabe yini siyenze ukudla,” esho phambili kwale khomishana.
OLUNYE UDABA: Uxoshiwe umfundisi wenyoka esikoleni
Lo mfundisi kuthiwa kade ayefunwa yile khomishana, kepha yena uthi: “Angikaze ngibaleke, bebengifuna bengangitholi nje kuphela. Ngizizele ngokwami lana.”
“Angizange ngikufundele ubufundisi, uNkulunkulu wakhuluma nami ngiqeda ukwenza umatikuletsheni, esho.
Uthe uzoqhubeka nokuhola ibandla lakhe.