Johannesburg – Usolwa ngokubandakanyeka ebugebengwini owesifazane obengumgadi wosana olunezinyanga ezingu-14 ubudala, oluthunjwe ngesikhathi kunesigameko sokuphanga endlini, eSoweto, ngaphambilini kuleli sonto, kusho amaphoyisa ngoLwesihlanu.
Ngokusho kwaGeneral Fred Kekane, uthi lo mfanyana, okunguSiyabonga Mlambo, utholakale eNewcastle emva komkhankaso omude wamaphoyisa wokumthungatha.
UKekane uthi ithimba ebeliphenya ngalesi sigameko lithole ukuthi kunezinto ezingahlangani encazelweni yalo wasifazane ogada ingane.
OLUNYE UDABA: Kuthungathwa ingane 'eyebiwe' umgibeli wetekisi
“Besibona ukuthi kukhona into engacacile ngomgadi wengane. Emva kophenyo olunzulu, kukhishwe umyalelo wokuthi kuboshwe umgadi wengane,”
UKekane uqhuba uthi lo wesifazane ogada ingane ungumzala kumama wale ngane, uMandisa, kanti uye waboshwa kanye nabanye ababili okusolwa ukuthi bebeyingxenye yalokhu kuthumba.
Bobabili laba basolwa bahlobene nalo wesifazane kanti omunye wabo uyisangoma.