Publications
Partners
Johannesburg - INational Prosecuting Authority (NPA) ithe ngoMsombuluko ayikakulungeli ukushushisa umshayeli webhasi lezingane zesikole oneminyaka engu-44 ubudala osolwa ngokunukubeza ngokocansi intombazanyana, ekuqaleni kwale nyanga.
"Ngokwemininingwane esiyitholile, akubonakali sengathi kunobufakazi obanele kuleli cala, yingakho simanqika ukushushisa kulesi sigaba."
OLUNYE UDABA:Ubufakazi obusha ecaleni likathisha waseNquthu
UMnyango wezeMfundo eGauteng ngeSonto esitatimendeni uthe kusolwa ukuthi umshayeli webhasi wanukubeza ngokocansi intombazane eneminyaka engu-13 ubudala, ngomhlaka-13 nangomhlaka-16 Okthoba nonyaka.
"UMbuso ucele amaphoyisa ukuba enze olunye uphenyo ngemuva kokubikelwa ngokuthi kungenzeka ukuthi kunabanye abafundi abane abazobhala izitatimende ngomsolwa."
Ngenxa yokuntula kobufakazi okwamanje, umshayeli webhasi uzodedelwa, kusho isitatimende.
Lesi sigameko senzeka nje, kusanda kuvela izinsolo ezithi unogada wasesikoleni samabanga aphansi esiseSoweto wanukubeza ngokocansi izingane ezingaphezu kuka-80 kulesi sikole asebenza kuso.
- African News Agency
