Kuduke umfana ominze behambe nesikole

Johannesburg – Umfana waseMotherwel, e-Eastern Cape, odukile, kusolakala ukuthi ugwilize emfuleni iRedhouse River behambe nesikole ngoLwesihlanu, kubika iHeraldLive.

Lesi sigameko senzeke ngabo-13:00 ngesikhathi lo mfana, 14, obehamba nezinye izingane ezingu-123 afunda nazo eNkwenkwezini Primary School, begudla lo mfula behamba nothisha ababili kanye nesisebenzi saseZwartkops Conservancy.

Ngokusho kwabezimo eziphuthumayo, la bafundi bese befike endaweni abazohlaba kuyo ikhefu ngesikhathi isisebenzi sizwa ukukhala kwamanzi sengathi khona umuntu ogxumbuzeka kuwo.

OLUNYE UDABA: Kuminze umfana, 9, emfuleni osePort Elizabeth

Sithe uma siqalaza sabona lo mfana elokhu eshona evumbuka emanzini kubonakala ukuthi uyaminza, kuthe ngokuhamba kwesikhathi wanyamalala phansi kwamanzi.

Okhulumela amaphoyisa uConstable Mncedi Mbombo uthe amaphoyisa angabatshuzi ahluleke ancama ukuthola lo mfana ngaphansi kwamanzi.

“Lezi zingane bezihambe nesikole ngesikhathi kwenzeka lo mshophi. Bezitsheliwe ukuthi zingabhukudi, kepha ngenxa yokuthi belishisa kakhulu ilanga, le ngane igxumele emanzini ithi iyabhukuda,” kusho uMbombo.

Isikole asitholakalanga ukuba siphawule.