Cape Town – Indoda esolwa ngokwakha itulo lokubulala izikhulu eziphezulu zikahulumeni ezithathwa ngokuthi ziyahlomula ezinsolweni zokulawulwa kombuso kulindeleke ukuthi ivele okokuqala eNkantolo yeMatshi yaseGoli ngoLwesihlanu.
Le ndoda eneminyaka engu-23 ubudala iboshelwe eMidrand ngoLwesithathu nalapho ibe isibekwa khona icala lokwakha itulo lokubulala kanye namanye amacala.
OLUNYE UDABA: Zimkhalele osolwa ngokwakha itulo lokubulala amalungu eKhabhinethi
Amaphoyisa ophiko loKlebe athi ngenyanga ka-Okthoba ngonyaka odlule avimba ukuxhumana ngalokho okwakungase kube ukubulala okwakuhlelwa nalapho iningi lezikhulu zeKhabhinethi, izinkampani zikahulumeni kanye nabanye abantu abadumile eNingizimu Afrika bebalwe njengabanye balabo abebezosocongwa.
Ngokusho kophiko loKlebe, umsolwa ungumsunguli we-Anti-State Capture Death Squad Alliance (ASCDSA) kanti uboshwe “ngesikhathi esematasa nokuchazela labo abanikela ngemali ukuthi ukubulawa kwabantu abazuza ekulawulweni kombuso bekuzokwenziwa kanjani ngoshayasibhamu abadubula bekude beshaya umshoshaphansi”.
Bangu-19 abantu obekuhlelwe ukuthi bazobulawa kanti amagama abo azodalulwa enkantolo, oKlebe basho kanjalo.
Isicelo sebheyili sizophikiswa ukuze kuvunyelwe ukuthi kuqhutshekwe nolunye uphenyo.