Durban - Kuboshwe indodana yekhansela lika-ward 1 ngaphansi kaMasipala waseMadlangeni ngemuva kokugwaza umuntu kubangwa ihhashi.
UThembinkosi Sangweni, 20, obengumfundi kaGrade 10 esikoleni iNzimane Combine eMadlangeni e-Utrecht ugwazwe amanxeba amabili esufubeni naseqolo ngoLwesihlanu.
OLUNYE UDABA: Owesilisa ugwazwe umakhelwane kubangwa intombi
Ngokomthombo we-EYETHU kuthiwa ingxabano yaqala ngaphandle kwesikole ngesikhathi umufi ephuma esikoleni ethi uyobuza umsolwa ukuthi ulenzani ihhashi lakubo.
"Umufi waphuma egijima esikoleni waya kumsolwa ethi uyobuza ukuthi ulenzani ihhashi lakubo. Umsolwa waphika ukuthi ihhashi lakwaSangweni leli ayeligibele," kusho lo mthombo.
Lo mthombo uqhube ngokuthi laba bobabili babelokhu bephikisana, omunye ethi elakubo nomunye esho okufanayo. Umsolwa wabe esehosha ummese wagwaza umufi amanxeba amathathu emzimbeni.
Amaphoyisa ase-Utrecht awatholakalanga ukuba aphawula njengoba umphathi wesiteshi ebengekho kanti nokhulumela amaphoyisa aKwaZulu-Natala uMajor Thulani Zwane ucele ukuthunyelelwa yonke imininingwane yodaba, ukuze ezokwazi ukuphendula.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter