Wadeville - Abasebenzi benkampani i-Lauds Foundry Equipment eWadeville, bahlukumezeke kakhulu ngoLwesithathu behlaselwa amadoda angu-15, kubika i-Germiston News.
Kulesi sigameko kudutshulwe kwabulawa isisebenzi esisodwa kubuka ozakwabo.
Okhulumela amaphoyisa ase-Elsburg uConstable Daphney Phooko utshele leli phephandaba ukuthi lokhu kwenzeke ngo-6.50 ekuseni.
“Kugasele amadoda angu-15 akhuluma isiShona, abayishumi kulawa madoda bebehlome ngezibhamu futhi afike aphoqa abasebenzi ukuba babavulele ngenkani,” kusho yena.
Kuthiwa abanye abasebenzi abafike ngemuva kwesikhathi nabo babingelelwe ngesibhamu bengena emsebenzini.
“Isisebenzi sokugcina, ikhetha elineminyaka engu-75, lifike lahlangabezwa abasolwa. Ngesikhathi bekhuluma nalo, leli khehla belikhuluma isiPutukezi nokuyinto ecasule abasolwa ngoba bebengazwani.
“Oyedwa wabasolwa udubule leli khehla esifubeni lashonela khona lapho.”
OLUNYE UDABA:Izigebengu zazifuna ukumshumpula 'induku'
Abasolwa babaleke nensimbi yohlobo lwe-nickel okukholakala ukuthi ingeyenani lika-R6 million beyithutha ngemigqomo beyifaka elolini, abasolwa babuye bathatha amakhompyutha kanye nomakhalekhukhwini wabasebenzi.
Abasolwa babaleke ngeveni elincane kanye neloli.
Abezimo eziphuthumayo babizelwe kule ndawo yesigameko kodwa ngeshwa bathola leli khehlaselishonile.
Amaphoyisa asaphenya kanti okwamanje akukaboshwa muntu.