Kuxwayiswe amantombazane ngocansi kulamaholidi

Mbombela - Kuxwayiswe abafundi baseSchoemansdal eMpumalanga ukuba bagweme ukuchitha amaholidi abo aDisemba ngokuzibandakanya ocansini abazozisola ngalo kusasa.

Isikhulumi sasesiShayamthetho eMpumalanga, uThandi Shongwe, ukusho lokhu ngesikhathi evakashele esikoleni iLugebhita Secondary, eningizimu neMalalane.

OLUNYE UDABA: Kuxwayiswa abafundi baseKZN ngezikole

“Ngiyaniyala wezingane zamantombazane ukuba nigxile ezifundweni zenu nikhohlwe okomhlaba, nisebancane futhi ngifuna nizigade kakhulu ngezinsuku zikaDisemba, ningabi ngondingasithembeni, nidlale abantu abangenandaba nekusasa lenu,” usho njalo.

UShongwe uphinde waxwayisa amantombazane ngokuthi njengoba ebhala izivivinyo zawo zokuphela konyaka angalibali izinkundla zokuxhumana ngaphandle uma besizana ngezifundo kuzo.

"Ngicela nabazali ukuba banikeze izingane isikhathi sokutadisha," usho njalo.

- “Like” ikhasi lethu kuFacebook ukuze uthole izindaba ngolimi lwakho                                

 - Landela IzindabaNews24 kuTwitter