Kimberley - Uvelile enkantolo owesilisa waseKimberley osolwa ngokugwaza umngani wakhe washona kubangwa izingcezu ezimbili zesinkwa.
Lona uvele eNkantolo eNkulu yaseNorthern Cape ngecala lokubulala, kubika iDiamond Fields Advertiser.
Ummangalelwa uMlungisi Memane, 22, usolwa ngokubulala uGopolang Quinton Mmokwa nokuzama ukubulala uLebogang Emmanuel Hopton kulesi sigameko esenzeka ngoJanuwari nonyaka.
UMemane uwaphikile womabili amacala, ethi wayezivikela.
OLUNYE UDABA: Ubulale umngani bephikisana ngabaholi bezombusazwe
Kulesi sigameko uMmokwa noHopton bagwazwa amanxeba amabili, okusolakala ukuthi bawagwazwa uMemane.
UMmokwa wabe eseshonela endaweni yesigameko.
UHopton ngoMsombuluko ugibele ebhokisini lofakazi wachaza ngosuku okwashona ngalo umngani wakhe omkhulu.
UHopton uthi babezitika ngotshwala ngesikhathi kuqubuka ingxabano phakathi kukaMemane noMmokwa.
Uthi uMmokwa noMemane babebanga izingcezu zesinkwa, basolana ngokuthi kukhona oncishanayo, kwagcina kukhishelwane ummese.