Pietermaritzburg - Owesilisa oneminyaka engu-23 ubudala udutshulwe wabulawa phambi kwabangani bakhe ngesikhathi besendleleni belibangise ukuyodlala i-snooker, eLaundaville, eCaluza, ngeSonto.
Ngokombiko wephephandaba i-KZN EYETHU isigameko esishiye umphakathi uthukile kuqhamuke amadoda amabili ehlome ngezibhamu aqonda ngqo kula bangani ase ebafuna ibhodlela.
La madoda abe esevulela nganganono oyedwa wabangani washonela esibhedlela i-Edendale.
OLUNYE UDABA:Owesifazane, 69, ubulawele 'ukuhleba'
Kubikwa ukuthi abasolwa bebehamba ngemoto yohlobo lwePolo emhlophe.
Omunye wabangani bakamufi, Ntokozo Nkomo, uthe umngani wakhe udutshulwe yize bebengenalo nalelo bhodlela likatshwala ebelifunwa ngabasolwa.
"Babe sebebuza umufi ukuthi uyagoloza yini ngaphambi kokumdubula esiswini maqede bangena emotweni bakhala amaphepha," kusho uNkomo.
Okhulumela amaphoyisa asePlessislaer uCaptain Musa Ntombela uqinisekise isigameko wathi amaphoyisa aphenya icala lokubulala.
"Bekungakaboshwa muntu."