Othisha bafuna ngaphezulu kuka-R2 000

Mthatha - Inyunyana yothisha iSadtu ithembisa ngokusiza othisha abagqilazwa yisikole esizimele.

Lokhu kungemuva kokuba othisha abangu-14 baseHoly Angels Private School eMthatha bethe sekuphele unyaka belwisana nomqashi ukuba abenyusele amaholo.

Othisha bangenele isiteleka kulesi sikole ngenyanga edlule, kodwa kuze kubemanje bathenjiswe ukwenyuselwa amaholo ngo-R300.

Ngokwama-payslips abonwe yiDaily Sun, othisha abahola kakhulu bathola u-1 900 ngenyanga, abanye bathola ngaphezu kancane kuka-R1 500.

Bonke othisha okukhulunywa ngabo baneziqu – abanye babo bagogode nangeze-honours degree – futhi babhalisiwe ngaphansi kweSA Council of Educators.

Funda nalolu daba: Kuboshwe owayeyisilomo sePirates

Bathi abanayo ngisho imihlomulo efana nezinsuku zekhefu noma eminye imihlomulo etholwa othisha bahulumeni.

Umnikazi wesikole, uSuma Pullukatu, uthe bacele abameli bezabasebenzi, iSmall Enterprise Employers of SA ukuba babamele phambi kweCCMA nakwezinye izingxoxo.

Unobhala weSadtu esifundeni sase-OR Tambo, uSiyabonga Gashi, ukuqinisekisile ukuthi iSaccawu icele ukuba isize othisha.

“Imali kathisha osaqala ukusebenza kumele iqale ku-R15 000 ingabaliwe imihlomulo. Sizozama ukubasiza bathole imali engcono abangaphila ngayo. Isikole okukhulunywa ngaso sixhaswe uhulumeni, ngakho noMbuso kumele udlale indima yawo ngalolu daba,” kusho uGashi.

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).