UBabo noSjava benze ezibukwayo EBuhleni ngeSonto

Durban - Okwenzeke EBuhleni ngeSonto bekungaphezu komcimbi kodwa kube wumkhosi obe yimpumelelo kakhulu.

Amaciko ahlukahlukene abeshiyelana inkundla enandisa ngomculo wowokholo. Ikwaya yeNabachu ifike yashukumisa inkundla ngengoma ebongelela uNyaziLwezulu, kuthe kusabhekwe lokhu, kwangena izintokazi ezimbili ezisencane zashaya imizwilili emibili epholile.

Luqhubeke njalo uhlelo kushintshana izikhulumi okubalwa kuzo noNgqongqoshe wezeMpilo uSibongiseni Dlomo ofike ebandleni wadlulisa ukubonga kwakhe ngokuhlanganyela nebandla.

OLUNYE UDABA:Selidumela emasumpeni ngomcimbi we-Dundee July

UDlomo uzwakalise nokuxolisa ngokuthi ngeke akwazi ukuhlala umcimbi uze uphele ngoba uphuthuma esikhumulweni sezindiza njengoba ezohamba nomsebenzi.

Yize kunjalo umcimbi uqhubekele phambili. Ukungena esiteji kukaBabo Ngcobo kushukumise inkundla.

Lo mculi uvule ngengoma ethandwa kakhulu ethi, Thixo Mkhululi. 

UBabo ubonge isimemo, wathi:"Mina ngikhulele kule ndawo futhi ngizizwe ngibusekile ngokumenywa kule ndawo ehlonipheke ngale ndlela."

Eseshaya ingoma yesibili, uBabo ugxume esiteji eshaya imidanso ehlukahlukene.

Kuphume uBabo kwangena ikwaya yeNatesa nayo eshaye ingoma ecokeme kakhulu. Singamshiya kanjani u-Ayanda Msweli, esimbone evukwa wusinga ethula inkulumo yakhe, wajabulisa abantu akekho obekangahleki. Inkulumo kaMsweli iqale yaze yaphela abantu befile yinsini.

Abantu bebecabanga ukuthi sekuphelile ukunandisa osaziwayo, kanti cha, lukhulu okusalindiwe.

USjava, ongumculi we-Afro Soul othandwa kakhulu kuleli, wenze ezibukwayo eBandleni.

Ugibele esiteji nenqwaba yezingane zicula futhi zidansa naye. Izingane zihlule nokuzibamba zatheleka zonke zizungeze isteji ubungafuna ukuthi sisekhonsathini kunandisa uSjava.

Ngisho eseqedile bekufana nokuthi umcimbi usuphelile ngoba izingane zonke zihambe naye, umuntu ngamunye efuna ithuba lakhe lokuthatha isithombe nalo saziwayo.