Publications
Partners
eGoli - Owayesebenza ezindlini endaweni yaseBirchleigh ukhokhelwe imali engango-R180 000 ngokuboshwa ngokungemthetho amahora angu-72 enengane yakhe eminyakeni emibili eyedlule.
Ngokubika kwephephandaba lomphakathi iKempton Express iNkantolo yesiFunda ePitoli iveze ukuthi ukuboshwa kwalo wesimame kwabe kungekho emthethweni wabe esefaka isimangalo kuNgqongqoshe wamaPhoyisa kanye noKhomishana kazwelonke ukuba bahlawule ngaloku.
“IMantshi ithe le nhlawulo ayisoze yaqhathaniswa nobuhlungu adlula kubo lo wesimame kanye nendodakazi yakhe,” kusho uFaith Munyati wenhlangano eyaziwa ngokuthi iLawyers for Human Rights.
Les sigameko senzeka ngomhlaka-7 Julayi 2015, lo wesimame ehamba emgwaqeni uStasie ebheke esiteshini sesitimela eBirchleigh.
Ngesikhathi efika esiteshini, wamiswe amaphoyisa amabili embuza ukuthi uphumaphi nokuthi uhlala kuphi.
OLUNYE UDABA:Sifune inhlawulo isangoma 'ebesishayela sibundlonyile'
“Wawatshela ukuthi uvela emsebenzini futhi ulibangise ekhaya lapho ahlala khona eTembisa,” kusho uMunyati.
La maphoyisa acela ukubona umazisi wakhe, wathi uma ewukhipha futhi utshengisa ngokusobala ukuthi yize engeyena owakuleli kodwa ulapha ngokusomthethweni.
La maphoyisa avuma ukuthi umazisi wakhe usemthethweni kodwa isitembu esifungelwe sesiphelelwe yisikhathi, waboshwa khona lapho wabekwa icala lokuba kuleli ngokungemthetho.
“Lokhu okwenziwa ngamaphoyisa kwakungekho emthethweni futhi ayengafanele ukuvuma ukuthi amaphepha akhe asemthethweni ajike lapho amubophe,” kuqhubeka lo mmeli.
