Johannesburg – Ikomidi eliphezulu kuMasipala weTheku selidalule ukuthi izindleko zokulungisa umonakalo wesiphepho sakamuva sezifinyelele ngaphezu kwengxenye yezigidigidi zamarandi.
NgoMsombuluko ikomidi eliphezulu ligunyaze umbiko emhlanganweni, othi imali okulindeleke kulungiswe ngayo ingqalasizinda eyalimala kunesiphepho ngomhlaka-10 Okthoba 2017 ingaphezu kuka-R576 million.
Kubikwa ukuthi ukulungiswa kwezinto zobunjiniyela kuzodla u-R308 million, ukulungiswa kwemizi khona kuzodla u-R250 million, iDisaster Management and Emergency Control izodinga u-R4.1 million, amapaki nezokungcebeleka azodinga u-R7.7 million, umsebenzi wokuhlanza nokukhuculula uzodla u-R1.3 million, ugesi uzodinga u-R2.6 million kanti owezamanzi nokuthuthwa kwendle uzodinga u-R2.3 million.
OLUNYE UDABA: Uphinde wanqatshelwa ibheyili osolwa ngokubulala umkakhe
Angu-60 amawadi akhahlamezeka kanti ingu-3 112 imizi eyathinteka.
Iningi lemizi eyathinteka, engu-2 425 kuyona iseningizimu yedolobha.
Umasipala esitatimendeni ngoMsomboluko uphinde wathi kuyaqhubeka ukubikwa kwezigameko emakhanseleni kanti nesibalo silokhu sikhule njalo, yingakho nemali ezodingeka ilokhu ishintsha.
Ngesikhathi kuhlasela lesi siphepho, kwashona abantu abangaphezu kwabayishumi abashona ngezindlela ezahlukene.