Durban - Usomabhizinisi waKwaZulu-Natal onesithembu, osephenduke isilomo ngomzuzwana, uMusa Mseleku, uthi uma unesithembu kubalulekile ukuthi usenelise ngayo yonke indlela.
UMseleku namakhosikazi akhe bafike kwezwakala nohlelo lwabo olusihloko sithi uThando Nesithembu ngesonto eledlule, olukhonjiswa ngoLwesine ngo-20:00 kuMzansi Magic, kubika iTimesLive.
Into eyagqama kakhulu ukuthi uMseleku uyindoda eyinjinga futhi ekwaziyo ukunakekela amakhosikazi ayo, kepha abanye abantu base befuna ukwazi ukuthi uwenelisa kanjani ngokocansi amakhosikazi amane.
UMseleku uthe kubalulekile ukuthi awenelise wonke amakhosikazi akhe ngokocansi, nangayo yonke indlela.
“Kuyaphoqa ukuthi ngibenelise bonke ngokulingana, ngingabi nakho ukwenzelela. Isithembu asincikile emalini nje kuphela. Asikho isikhathi sokubeka izaba, nokuthi kube khona unkosikazi osala ekhala. Kumele bonke ubenelise ngendlela efanayo,” esho.
Ube esedlulisa umyalezo wokuthi amadoda angangeni esithenjini uma “engajimile”.
OLUNYE UDABA: UMBONO: Ushukumise isizwe uMseleku
Ngemuva kwalolu hlelo iningi labesifazane libhale ezinkundleni zokuxhumana, lizwakalisa isifiso sokuba yinkosikazi yesihlanu kwazise unamane okunguMaCele, uMaYeni, uMaKhumalo noMaNgwabe.
Kulolu hlelo uMseleku ongowaseMzumbe uvele eqhakambisa isithembu sakhe nokuthi usithanda kanjani, nezinto asezenzele amakhosikazi okubalwa ukuwathengela izimoto zikanokusho nezithabathaba zemizi awakhele yona.
Engxoxweni abe nayo neLANGA LangeSonto, uMseleku obesebenza emkhakheni wezindaba oKhozini FM phambilini, uthi uthukile ngendlela abantu abalwamukele ngayo uhlelo lwakhe, njengoba kusuke inhlokomo ezinkundleni zokuxhumana.
“Nakuba ngingumuntu ongagxilile kakhulu ezinkundleni zokuxhumana kodwa okwenzekile ngesikhathi kudlala uhlelo nangemuva kwalo kungithusile kakhulu,” esho ezwakalisa ukuthi usamangele exoxa naleli phephandaba.
UMseleku uveze ukuthi uzothatha unkosikazi wesihlanu maduze.