Usomatekisi obulewe watshelwa ukuthi izinsuku zakhe zibaliwe

Springs - Usomatekisi u-Elfas Mzolo, 53, kanye nomshayeli wakhe uDumisani Sithole badutshulwe amahlandla ambalwa erenki yamatekisi kwaThema, eSprings.

Ngokubika kweSowetan, uMzolo ushonele endaweni yesigameko kanti uSithole ubangwa nezibi esibhedlela.

Ngokusho kwamaphoyisa, laba bahlaselwe yiqulu lamadoda ngo-21:00 ebusuku elifike lavulela ngenhlamvu.

Okhulumela amaphoyisa uCaptain Johannes Ramphora uthe baphenya icala lokubulala kanye nokuzama ukubulala.

Umngani kaMzolo obuye abe nguzakwabo kule mboni uSbusiso Mtshali uthi emasontweni amabili adlule umngani wakhe wamtshela ukuthi kukhona omshayele ucingo wamtshela ukuthi izinsuku zakhe sezibaliwe.

"Wangitshela ukuthi lo muntu wathi umi endleleni yakhe. Akazange angitshele ukuthi yini le okuthiwa akayiyeke.

"Angikholwanga uma ngibona isidumbu sakhe ngoba benginaye khona erenki ngalolo suku," kusho uMtshali.

OLUNYE UDABA:Kudutshulwe kwabulawa usomatekisi eThekwini

UMtshali uthi yena noMzolo bebesanda kubasa ukuze bafudumale ngoba bebematasa nomsebenzi wamatekisi ahambela esifundazweni i-Eastern Cape.

"Ngimshiye ngemuva kokuthi ngifonelwe yintombi yami. Ngemuva kwemizuzu embalwa kungene ucingo oluthi uMzolo noSithole sebedutshuliwe," kuqhubeka uMtshali.

UNhlakanipho Mzolo, 20, oyindodana kamufi uthe uyise ubengumuntu onothando futhi ethanda ukuncokola.

"Ubewuthanda umndeni wakhe. Impilo isazobanzima kakhulu ngaphandle kwakhe," kusho yena.