Durban - Usathukile owesimame waseThekwini kulandela ukunikezwa umlotha womzimba kamngani wakhe ngocwazi wakwaShoprite.
UCarla Britz-Borges ukwenze umsebenzi wakhe ukuqinisekisa ukuthi umngani wakhe uvaleliswa ngesizotha.
“Ngizamile ukucinga abazali bakhe kodwa ngagcina ngithole umfowabo kanye nodadewabo abanikela ngemali yokuqhuba inkonzo yokuthi alothiswe.
“Enye imali ngiyiboleke kubaba niengoba ngingasebenzi,” kusho yena.
Le ntokazi ithi icele uTony Naidoo wePhoenix Funeral Service ukuba amlethele umlotha ugoqwe kahle khona azowusakaza ogwini oluseningizimu yesifundazwe.
OLUNYE UDABA:Ubuyiselwe kuleli umlotha kaJanice Linden
NgoLwesibili ekuseni umshayeli osuka kula bangcwabi kuthiwa ufike kwaBritz-Borges nocwazi wakwaShoprite uqukethe umlotha.
“Umlotha ubuchitheka kulo cwazi. Lokhu kungicasule kabi ngoba ngenze umsebenzi omkhulu ukuhlonipha umngani wami kodwa ekugcineni banginikeza umlotha wakhe ngocwazi,” kusho yena.
UBritz-Borges uthathe isithombe salo cwazi wasifaka enkundleni uFacebook.
Lo wesimame uthe ukhokhe imali engango-R5 200 kule nkampani kodwa akajabule neze ngokusebenza kwayo.
Ngesikhathi abezindaba bekhuluma noTony Naidoo uthe akacelwangwa ukuba awugoqe kahle umlotha. Uthe yingakho bewufake eplasitikini ngoba bazi ukuthi uyolahlwa.
“Ngixolisile kulo wesimame kodwa akazange angicele ukuba ngiwugoqe kahle umlotha," esho, kubika iTimeslive.