Pretoria – Owesilisa oneminyaka engu-30 ubudala, okukholakala ukuthi ungumdlali webhola elikhokhelayo, ukhalelwe ngamasongo kaSigonyela ekuseni ngoMsombuluko ngezinsolo zokushaya iphoyisa lomgwaqo.
Amaphoyisa aseGauteng akhiphe isitaimende athi lesi sigameko senzeke kuN1 North noR362.
Awazange alikhiphe igama losmolwa, kepha bathi udlalela iqembu lakuleli.
"Kusolakala ukuthi ngabo-02:00 umsolwa ubeshayela imoto budedengu wase emiswa amaphoyisa,” kusho owamaphoyisa uCaptain Tsekiso Mofokeng.
OLUNYE UDABA: Zimkhalele umsakazi obanjwe ‘eshayela ephuzile’
"Amaphoyisa abe esebona ukuthi umshayeli udle amanzi amponjwana engakwazi nokuma kahle. Ucelwe ukuba akhiphe izincwadi zokushayela, kwabe sekusuka isidumo washaya iphoyisa ngezimpama walishaya nangokhiye bemoto.”
UMofokeng uthe amaphoyisa akwazile ukuhlula umsolwa ngamandla wase eboshelwa ukushaya iphoyisa, ukushayela ephuzile nokunqaba ukuboshwa.
Kulindeleke ukuba avele eNkantolo yeMantshi yasePitoli ngoLwesibili.