Wangiphoxa kakhulu uZille ngesenzo sakhe - Maimane

Johannesburg – Umholi weDemocratic Alliance uMmusi Maimane utshele izindaba ze-Eyewitness News ukuthi kwamjabhisa ukuphawula kukaHelen Zille ngohulumeni wengcindezelo.

UMaimane uthi lokho kwenza ubudlelwane babo babanzinyana, kusho lo mholi okhulume ngokukhethekile ne-EWN.

UZille uzoqondiswa izigwegwe ngaphakathi eqenjini kulandela ukuthi uMaimane adlulisela udaba lwakhe ekomidini lezomthetho leqembu.

OLUNYE UDABA: UZille uzoqondiswa izigwegwe ngakubhale kuTwitter – Maimane

UZille wavusa umsindo ngesikhathi ebhala enkundleni yezokuxhumana uTwitter wathi akulona iqiniso ukuthi konke okwakwenziwa uhulumeni wengcindezelo kwakukubi.

Lo Ndunankulu waseWestern Cape wabhala kanje kuTwitter: “Ngingena ebhanoyini manje futhi angeke ngingene ku-Wi-Fi ukuze ngizonqamula labo abacabanga ukuthi yonke into eyashiywa uhulumeni wengcindezelo yayiyimbi.

“Kulabo abacabanga ukuthi okwashiywa uhulumeni wengcindezelo kwakukubi kuphela, cabanga ngezobulungiswa zethu ezizimele, ingqalasizinda yezokuthutha, amanzi asemapayipini nokunye,” eloba.

Wabuye waxolisa ekuhambeni kwesikhathi.

“Ngiphoxeke kakhulu,” kusho uMaimane kule ngxoxo, mayelana nesenzo sikaZille.

“Ubudlelwane bethu abusafani nakuqala manje, izinto sezinzima, lokho akubuzwa. Ukuphawula kwakhe ngaleya ndlela kwasilimaza kakhulu isithunzi seqembu njengoba kuyiwa okhethweni,” esho.

Uqhube wathi, ngokwakhe, uyavuma ukuthi ukuphawula kukaZille kubukela phansi isithunzi sabantu base-Afrika.