Pretoria – Sekuvele imibiko ethi omunye wothisha besikole somntakabani ePitoli, wesulile emsebenzini kulandela izinsolo zokunukubeza abafundi ngokocansi.
I-Eyewitness News ibike ukuthi abafundi ababili baseSt Albans College baphumele obala bathi banukubezwa yilo thisha.
Lo thisha ube esefaka incwadi yokwesula emsebenzini kulandela uphenyo lwangaphakathi.
Amaphoyisa kuthiwa asaqhuba olwawo uphenyo.
OLUNYE UDABA: Kuqulwa icala lomkhulu owayencenga umzukulu ngocansi
Lesi sikole esifunda abafana kuphela, singezinye zezikole ezimba eqolo, njengoba imali yokufunda yangonyaka ozayo isinyuke yaba ngu-R197 000.
Sekuke kwaba nezigameko ezifuze lesi ezikoleni eziningi kuleli.
NgoJulayi, iReddam House Constantia yaqinisekisa kuNews24 ukuthi yadabula inkontileka kathisha ofundisa umculo kulandela “ukungaziphathi ngendlela”.
NgoJuni, ababengabafundi baseDurban High School (DHS) badalula ukuthi banukubezwa nguthisha weMaths odumile iminyaka engu-30.