Kuduke izidakamizwa ekomkhulu lamaphoyisa

Paris - Izikhulu zaseFrance seziyalele ukuthi kuqalwe uphenyo kulandela ukuduka kwezidakamizwa zohlobo lwe-cocaine ezinesisindo esingu-50kg, neziduke ekomkhulu lamaphoyisa eParis.

Kuvele ngoLwesine ukuthi lezi zidakamizwa azisekho kule ndawo kwase kuqalwa uphenyo, kusho amaphoyisa.

Lezi zidakamizwa zazishaqwe ezindaweni ezehlukene ngoJulayi zase zibekwa egumbini elinezokuphepha eziqinile.

"Uma uphenyo luveza ukuthi kukhona ukwephulwa komthetho okwenzekile… kuzobe sekuthathwa izinyathelo ezinqala,” kusho amaphoyisa.

Ukuvela kwalolu daba sekuphoxe kakhulu amaphoyisa alwa nobugebengu eParis.

Leli komkhulu ladonsa amehlo omhlaba ngo-Ephreli ngesikhathi amaphoyisa amabili asebenza khona ebekwa icala lokudlwengula isivakashi sesifazane saseCanada.

Isisulu, 34, sithi sadlwengulelwa kuleli komkhulu ebusuku, ngemuva kokuhlangana nala maphoyisa endaweni yokucima ukoma.

 - “Like” ikhasi lethu kuFacebook ukuze uthole izindaba ngolimi lwakho

 - Landela IzindabaNews24 kuTwitter