Unkosikazi uvume itulo lokubulawa komyeni

Jakarta –  Unkosikazi uzivumele ukuba wungqondongqondo ekubulaweni komyeni wakhe owatholwa esigangeni enqunywe uqhoqhoqho esiqhingini saseBali e-Indonesia ngokusho kwamaphoyisa. 

Kubikwa ukuthi uRobert Ellis oneminyaka engu-60 ubudala wabulawa ngenxa kankosikazi wakhe okuthiwa nguye owapheka itulo lokubulwa kwakhe. 

Ngokokusho kwamaphoyisa kusolakala ukuthi lo nkosikazi wayebheke izizumbulu zemali ngesikhathi ebulala umyeni wakhe.

Kuthiwa isidumbu sika-Ellis sitholwe ngamalungu omphakathi sesonakele ngoLwesibili sigoqwe ngoplasitiki nezingubo. 

OLUNYE UDABA: Uboshiwe othengele umyeni wakhe izinkabi

Kubikwa ukuthi unkosikazi uJulaikah Noor Ellis waya emaphoyiseni ukuyobika ukuthi umyeni wakhe udukile nokuthe ngemuva kwalokhu kwatholakala isidumbu somyeni.

Umbiko uveza ukuthi ngemuva kokutholwa kwesidumbu amaphoyisa abophe lo nkosikazi njengomsolwa oqavile.  

“Siqale ukwenza uphenyo ngokufa kuka-Ellis nokuthe uma sibuza abasondelene nalaba bashadikazi sathola ukuthi besekubheda emshadweni wabo nokuyilapho sisole khona isandla semfene,” kuchza umphenyi wecala uWisnu Wardana.

Uqhube wathi bamphenye ngemibuzo unkosikazi wagcina ezivumele ukuthi nguyena opheke itulo lokubulawa komyeni nakuba engambulalanga yena uqobo.

Kuthiwa u-Ellis ubulawe yisoka lesisebenzi sasendlini esibasebenzelayo. 

     - “Like” ikhasi lethu kuFacebook ukuze uthole izindaba ngolimi lwakho

        - Landela IzindabaNews24 kuTwitter