Kutholakale usana lubekwe emkhombeni wezinkomo esontweni

New York – Kutholakale usana olusanda kuzalwa, inkaba ingakasikwa, lubekwe emkhombeni wezinkomo esontweni eliseNew York, kusho amaphoyisa ngoLwesibili.

Lolu sana obeluqandula lutholwe amalungu ebandla eHoly Child Jesus Church ngoMsombuluko, lugoqwe ngethawula, kuqhuba amaphoyisa.

UFata Christopher Ryan Heanue, ongomunye wabaphriste kuleli bandla, uthe abakholwanga ngesikhathi bezithela kulolu sana.

OLUNYE UDABA: Kutholwe usana lulahlwe ngasezindlini zomsakazo

“Okuhle ukuthi umama wale ngane unqume ukuzobeka le ngane esontweni – okuyikhaya labaswele vele,” kusho uHeanue.

“Izithandani ezisencane ebandleni lethu zingathanda uku-adoptha lolu sana,” esho.

Abosizo lokuqala bahambise le ngane esibhedlela kanti amaphoyisa ayaphenya ngalesi sigameko.

Ngokomthetho waseNew York, abazali bangazishiya izingane zabo ezindaweni eziphephile uma bengazifuni, inqobo nje uma zithola ikhaya elifudumele.