Durban - Uphithanelwe yikhanda owesifazane waseBizana, e-Eastern Cape, kodwa ozinze eGlebelands, eningizimu yeTheku, owathola ukuthi ushonile kodwa ebe ephila, kubika iphephandaba ILANGA.
UThobeka Mthwa, 36, ukhala ngobudedengu athi benziwe uMnyango wezaseKhaya e-Eastern Cape njengoba kuvela ukuthi ufile kodwa ebe esadla anhlamvana.
Kuvela ukuthi kunowesifazane waseMthatha – khona e-Eastern Cape – oshonile, naye onguThobeka Mthwa onezinombolo zikamazisi ezifana nezikaMthwa obezifikele mathupha emahhovisi ephephandaba ILANGA ngoLwesihlanu olwedlule ehamba nomfowabo, uMashiya Mthwa, bezocela ukusizwa mayelana nalolu daba.
Utshele iphephandaba ukuthi uthole ngoNovemba 2014 ukuthi ushone ngo-2011 – ngesikhathi eyovula isikweletu sasesitolo.
Uthathe ibhasi lokuqala eliya e-Eastern Cape elibhekise emahhovisi oMnyango wezaseKhaya eBizana.
Efika khona, bakuqinisekisile ukuthi ushonile. Utshele iphephandaba ukuthi usezame wancama ukulungisa le nkinga.
OLUNYE UDABA: Imile impilo kowesifazane ongenawo umazisi
Uthi impilo inzima njengoba nengane yakhe eneminyaka engu-15 ubudala eseze wayibhalisa ngokuthi ngekadadewabo ngoba yena akakwazi kuyenzela lutho njengoba ‘efile’.
“Ngikhathele wukulokhu ngehla ngenyuka kula mahhovisi ekubeni kangitholi ngisho noluncane usizo,” kusho uMthwa.
Uthi uneminyaka engu-18 enomazisi futhi kawukaze ulahleke.
ILANGA lixhumane noVuyelwa Gagazi, ongumphathi wakwandabazabantu eBizana, otshengise ukungabi nasikhathi futhi wezwakala enokuzithwala okuyisimanga.
“Ngeke ngimsize ngalutho mina futhi kangihlangani nezindaba zomazisi. Uma enenkinga kumele azozilungisela yena,” kusho uGagazi.
Imenenja yakwandabazabantu eZibaza, uSiphiwo Ngqozi, icele ukuthunyelelwa imininingwane kamazisi kaMthwa yikhona bezolulandela lolu daba kwakhe.
– "Like" ikhasi lethu ku-Facebook uze ukwazi ukujoyina inkulumo ngolimi lwakho.