Publications
Partners
Durban - Uthwele kanzima owesifazane waKwaDabeka, entshonalanga yeTheku osekuphele iminyaka egqigqa ezibhedlela zikahulumeni ezama ukuthola usizo mayelana nenkinga abhekene nayo yezinso okuvele ukuthi kazisasebenzi, kubika iphephandaba ILANGA.
UNkk Thembisile Mshengu uthi uthole ngo-2013 ukuthi unenkinga yezinso esesibhedlela iKing Edward VIII eningizimu yeTheku kodwa elokhu ejikiswa engasizwa.
Uthi ngowezi-2014 utshelwe yilesi sibhedlela ukuthi izinso zakhe kazisasebenzi, usedinga ukuhlanzwa ukungcola namanzi asemzimbeni kusetshenziswa umshini (dialysis) kodwa ngeke aluthole lolu sizo uma enganayo i-medical aid ngenxa yokuthi umshini osetshenziswayo uyabiza.
Uthi odokotela bebelokhu bethi makabuyele ekhaya ayozama i-medical aid. Uthi ngaleso sikhathi engalutholi usizo, isimo sakhe besilokhu siba sibi kakhulu.
Kumanje akasakwazi ukuhamba, umzimba uyavuvukala uphihlika amanzi nezilonda ezinyaweni.
"Kungixakile ukuthi ukuze ngelashwe ngidinga le medical aid ngoba ngazi ukuthi kayisebenzi ezibhedlela zikahulumeni. Ngibachazele ukuthi kangisebenzi futhi nomyeni wami akasebenzi ngakho akekho ongangisiza. Ngitshelwe ukuthi akukho engingasizwa ngakho kuze kube ngithola i-medical Aid.
“Inkinga manje umzimba wami uyakhukhumala, uma ngidla kuyazibuyela, ngisho amanzi imbala ayabuya. Sengiyinto yombhede nje ngenxa yokukhukhumala. Bengicela kunoma ngubani ongaba nobubele angilekelele ngikwazi ukukhokhela izindleko zasesibhedlela," kusho uNkk Mshengu.
Uthi ulaliswe eKing Edward izinyanga ezintathu wadluliselwa eChief Albert Luthuli Central Hospital bamfaka izinsimbi ngaphakathi.
OLUNYE UDABA: I-ANC iziqhelelanisile namazwi kaMaine
"Ngidedeliwe esibhedlela ngatshelwa ukuba ngibuyele emuva kwezinyanga eziyisi-6 ngiyokhipha lezi zinsimbi. Zingibulele izinhlungu sengisekhaya, kungasalaleki nasebusuku kangangoba ngize ngacela umyeni wami ukuba angiphindisele esibhedlela ngiyozikhipha," kusho yena.
Umndeni kaNkk Mshengu uthi ungajabula kakhulu uma ungathola usizo. Umyeni kaNkk Mkhengu, uMnu Elias Mshengu - okunguyena omnakekelayo - uthi kuphoqeleke ukuba ashiye umsebenzi ngoba engekho umuntu obenganakekela umkakhe.
"Impilo inzima kakhulu, siyacela kunoma ngubani ongasilekelela kulolu sizi. Siyacela nakuyena ungqongqoshe wezempilo (uDkt Sbongiseni Dhlomo) ukuba asizwele ukuze ezolapheka umkami," kuzikhalela uMnu Mshengu.
UDkt Dumisani Zungu ongudokotela wabesifazane osebenzela eMaxwell Centre enkabeni yeTheku, uthi uma usukulesi sigaba sikaNkk Mshengu lisuke lingasekho ikhambi ngaphandle kwe-dialysis.
Uthi ngaphandle kwalokhu sekungamele kube khona emndenini wakhe abangamnikelela ngenso. Umshini wokwenza i-dialysis uthi ogulayo kumele angene kuwona kabili noma kathathu ngesonto ngoba usuke usuphenduke izinso zakhe njengoba zona zisuke zingasasebenzi.
Okhulumela uMnyango wezeMpilo KwaZulu-Natal, uSam Mkhwanazi, uthe: “Imininingwane emayelana nokwelashwa kwesiguli iyimfihlo phakathi kwaso nezisebenzi zezempilo ezisuke zenze izifungo ngalokhu, futhi ezisuke zilawulwa wumthetho. Mayelana nesiguli simbe eselashwa kwezinye zezikhungo zomnyango, isiguli sibe nezingxoxo nabezempilo kubandakanya nokwalulekwa ngokomqondo. Kanjalo futhi lesi siguli siyaqhubeka nokuthola usizo lwezempilo.
“Umnyango nokho ungakusho ukuthi uzoqhubeka nokuthuthukisa indlela izisebenzi zezempilo ezixhumana ngayo nalabo abasuke belashwa kumbe izihlobo zabo."
