Publications
Partners
Durban - Obeyimenenja yeSoul Brothers uBhodloza Welcome Nzimande udalule ukuthi akaseyona imenenja yaleli qembu lombhaqanga ngokugcwele kodwa useyalisiza nje lapha nalaphaya uma kunesidingo.
"Kubalulekile ukuba lizenzele okuningi iqembu uma selibonakala ukuthi selikhulile. Ngiyidlalile eyami indima ikakhulukazi ngasodabeni lokuba ngilikhuthaze ukuba lizikhave ngomshwalense.
"Ngiyaziqhenya ngokuthi wonke amalunga eSoul Brothers akhavekile, ngeke kufane nabanye abaculi esibaziyo abazunywa wukufa kwaba nzima nokuba bafihlwe," kubeka iMbodlomane njengoba ayebizwa ngabalandeli bakhe esesoKhozini FM.
OLUNYE UDABA:Ukhiphe unqambothi oweSoul Brothers
Kuzokhumbuleka ukuthi ngesikhathi kufihlwa omunye wabasunguli baleli qembu uDavid 'Mdavu' Masondo, uBhodloza wabamba elikhulu iqhaza wafihlwa ngesizotha esimfanele.
Uthi kubalulekile ukuba abaculi baqikelele ukuthatha imishwalense izinto zisabahambela kahle.
"Okunye engifisa abaculi nabaphathelene nezokungcebeleka bakwazi wukuthi kumele bazihlole igazi ukuze bahlale bezazi ukuthi baphethwe yini. Izifo ziyanqandeka zingakabhebhetheki uma zisheshe zabanjwa," kubeka yena.
Umholi we-Soul Brothers uMoses 'Black Moses' Ngwenya uhambe emazwini kaNzimande mayelana nobumenenja beqembu wathi: "Noma engaseyona imenenja egcwele uBhodloza kepha sisabambisene naye kokuningi. Siyohlala siludinga usizo lwakhe, uyindoda enobuhlakani ikakhulukazi kwezomculo. Konke lokhu akushoyo kubaculi kuyikho, mabazinakekele."
Khonamanjalo ngoMgqibelo uNzimande ubefihla umfowabo uMnu Mfakazeli "Two piece" Nzimande (66) wasePhatheni eRichmond maphakathi neKwaZulu Natal, oshonele esibhedlela i-Edendale eMgungundlovu emuva kokuxinwa wukugula.
- ILANGA
