Durban - Udonsa kanzima owesifazane waseWombe KwaMaphumulo, enyakatho-mpumalanga yeKwaZulu-Natal ongasebenzi, obusiswe ngamawele amane okungabafana ababili namantomabzzane amabili, anezinyanga elizi-18 ubudala.
UNkz Thobile Ngiba, 37, ucela uxhaso kunoma ngubani ongamsiza kwazise udonsa kanzima ukondla izingane zakhe.
ILANGA livakashele uNkz Ngiba lapho eganele khona, uveze ukuthi uyise wezingane ubamba amatoho eGoli. Uthi amabili aphila ngokuncela ibele kanti amanye amabili kawalithandi, kunzima ukuwapatanisela imali yokuthenga ithini lobisi.
OLUNYE UDABA:‘Ngiyehluleka ukukhulisa amawele amathathu'
"Ngiyabikelwa njengoba kuza ubusika ngoba izingane zami kazinazo nezinto zokugqoka. Sengisizwa wukuthi yisehlobo manje kuyashisa, zihlale zingagqokile. Ngike ngiswele ngisho amanabukeni ezizowagqoka," kubalisa uNkz Ngiba.
Uthi imali yesibonelelo kahulumeni ayithola nyanga zonke iphelela ekudleni, nakhona okunganeli.
"Kunzima ukukhulisa amawele amaningi kangaka uma ungasebenzi. Ngiyasijabulela kakhulu isipho engasiphiwe nguMdali, ngingajabula uma ngingathola uxhaso noma ngabe yiluphi ukuze ngikwazi ukukhulisa izingane zami," usho kanje.
Ngesikhathi exoxa naleli phephandaba, amawele abengazibekile phansi emdonsa efuna ukuncela, kungekho elifuna ukunika elinye ithuba. Uthi yiyona mpilo ayiphilayo le yokuhlale edonswa kubangiswa ngaye uma abantwana sebefuna ukuncela.
Kunzima nokuthi ayofuna amatoho ngoba ngeke akwazi ukuwashiya noninakhulu ngoba angahluleka wukuwagada njengoba emaningi.
UNkz Ngiba unezinye izingane ezintathu ngaphandle kwamawele. Uthi uyise wazo naye uyiwele kanjalo naye uzalwa namawele kubo.
"Ngilama amawele, ngiphinde ngalanywe ngamawele. Sinomlando ofanayo wokuba khona kwamawele emindenini yethu," kusho uNkz Ngiba.
Uthi angajabulela noma yiluphi uxhaso angaluthola ukuze kusizakale izingane zakhe ukuba zikhule.
Laba bantwana bakhe kabamhluphi ngokugula, uthi baphila kahle bayimiqemane. Lokhu kufakazelwa wukuthi akaze awayise esibhedlela selokhu azalwa, ugcina ngokuwahambisa emtholampilo uma eyogonywa kuphela.
Nakhona uthi uma ewahambisa emtholampilo kumele athole abantu ababili abazomphelezela nabo abakhokhele ngoba ngeke akwazi ukuhamba yedwa nezingane eziningi.
- “Like” ikhasi lethu kuFacebook ukuze uthole izindaba ngolimi lwakho
- Landela IzindabaNews24 kuTwitter