Publications
Partners
Bashiyeke bematshekile abahlali bamatyotyombe iSect 5, eKTC, emva kokuba umlilo nobukhatshwa ngumoya utshabalalise amatyotyombe angama 51, washiya abantu abali 101 bengoodingindawo.
Esi sithwakumbe sehle ngoLwesihlanu umhla wesihlanu kuTshazimpunzi.
Unobangela wesi siganeko awaziwa.
Omnye wamaxhoba uBulelwa Sitelo (onama 56) uchaze imeko abaphila phantsi kwayo nanje ngenzima kakhulu.
Ecacisa ngendlala oqale ngayo lo mlilo, nobashiye bezimpula zikalujaca, uthe uqale kanye kwihoki esemva kweyakhe.
“Uqale emva kwentsimbi yesibini emini, phofu bendikhona ndisendlini. Mna ndothuswe ngabantu ebebekhazwa besithi ‘kuyatsha’. Xa ndiphuma abe amadangatye kule hoki uqale kuyo sele ephumele ngaphandle ethungela kule yam. Akhange ndibesajika, ndiye ndakwaza abantwana ukuba baphume sabaleka,” ucacise watsho Sitelo.
Waleke ngelithi bekungekho bantu kwihoki oqale kuyo umlilo.
U-Funeka, nongumama wabantwana abathathu, uthe kunzima kulilitye akazazi ukuba uzothatha ntoni adibanise nantoni ngoba abaphangeli bonke endlini, watsho ebongoza nabani na onokwazi ukubanceda eze ngaphambili. Uthe eyona nto bayidinga ngamandla zizinto zokwakha kunye nokutya.
Uceba ka Wadi 38, nequka la ngingqi, uSuzanne Zumana uthe uwaxelele onke amasebebe esiXeko saseKapa abandakanyekayo, kuquka iSebe loKuhlaliswa koluntu kuzwe lonke kunye nombuthu wesisa iGift of the Givers ukuba ancede. Uyibethelele eyokuba umba wezindlu kulandawo awukacaci.
U-Sonica Lategan, osisithethi kwiCandelo lezeNtlekela kwisiXeko saseKapa, ukungqinile ukuba ngama 51 amatyotyombe atshileyo, nalapho kuye kwashiyeka abantu aba-101 bengenamakhaya.
Uthe nangona amanye amaxhoba omlilo sele eqalisile ukwakha amatyotyombe, uninzi lusafihle iintloko kwizihlobo nezalamane.
U-Lategan ucacise ukuba uceba wengingqi usathetha-thethana neCandelo lokuHlaliswa koLuntu kuzwelonke ngenjongo zokuzama ukufumana uncedo ukuze amaxhoba akwazi ukwakha iihoki zawo.
“Siye sacela iGift of the Givers kunye Arhente ejongene nentlalontle yoluntu yase Mzantsi Afrika (iSouth African Social Security Agency ngabula makhumsha) ukuba bazame ukuncedisa ngeengubo, izinto zabantwana, ukutya njalo njalo. Ukanti icandelo lezombane kwisiXeko saseKapa liye lacima wonke umbane kule ngingqi kude kugqitywe ukucocwa,” uthethe watsho uLategan.
