Dít is die belangrikste les wat die Cheetahs sover in 2012 se Super-rugbyreeks geleer het en ’n saak wat hulle volgens die Springbok-flank Heinrich Brüssow reeds Sondag teen die Melbourne Rebels wil regstel.
“Die druk het vermeerder ná die nederlaag (teen die Brumbies), aangesien ons twee of drie wedstryde op toer wou wen,” het Brüssow aan ABC News gesê.
Hy erken die frustrasie in die kamp is groot ná die nederlaag, veral oor die wyse waarop hulle verloor het nadat hulle ’n voorsprong van 23-10 gehad het.
Die Cheetahs het ook in hul eerste wedstryd, teen die Lions, ’n voorsprong van 22-10 prysgegee.
“Ons sal dié week hard moet werk om klein foute reg te stel. Ons het as span hard gewerk om (teen die Brumbies) op te staan ná ’n teleurstelling (teen die Bulls). Daar was ’n goeie verbetering (teen die Brumbies), maar ons het klein foute gemaak en kon nie sekere geleenthede afrond nie.
“Ons het hulle toegelaat om terug te veg.. kyk na die telbord.”
Brüssow was met 21 duikslae weer pure Bok teen die Brumbies.
Hy het ewe veel gewoel by die afbreekpunte en saam met sy kaptein en haker, Adriaan Strauss, die vaskopstut, WP Nel, agtsteman, Ashley Johnson, stut Coenie Oosthuizen en vleuel Willie le Roux as baldraers beïndruk.
Oosthuizen en Johnson se insluiting in die beginspan het ’n yslike verskil gemaak, en die Cheetahs het in Canberra die eerste keer die seisoen weer soos ’n span met woema op die aanval gespeel.
Soortgelyke byt sal teen die Rebels benodig word. Die Rebels is die laaste tyd dramaties aan die verbeter sedert hulle die gewese -Wallaby-verdedigingsghoeroe John Muggleton betrek het.
Muggleton se aanstelling lewer vinnige resultate op nadat sy span in 2011 gemiddeld 35 punte en 4 drieë per wedstryd afgestaan het.
Die Reds kon verlede Saterdag slegs 11 punte teen die span van Melbourne opstapel.
Vir die jongste sportnuus volg Nuus24Sport op Twitter.
– Sport24