Nuus24

ANC woedend oor Zille-opmerking

2012-03-21 17:01
Johannesburg – Die ANC het Woensdag gesê hy is woedend oor ‘n opmerking wat Helen Zille, DA-leier, gemaak het waarin sy na Oos-Kaapse leerlinge wat na die Wes-Kaap stroom vir ‘n beter opvoeding as “vlugtelinge” verwys het.

“Die ANC is reg bewys deur die stelling wat Helen Zille gemaak het,” het Jackson Mthembu, ANC-woordvoerder, gesê.

“Dit is tipies van die destydse apartheidregering se mentaliteit wat maatreëls in plek gestel het om swart mense daarvan te weerhou om na die sogenaamde wit gebiede te beweeg.”

Mthembu het gesê die stelling is “rassisties” en moet nie verdra word nie.

Die DA-leier se opmerking het Dinsdag ‘n oorlog op die sosiale netwerk Twitter ontketen, aangesien baie gebruikers ontsteld was oor haar gebruik van die woord “vlugteling”.

Zille het haarself egter gedurende die dag verdedig.

Haar stelling het verwys na ‘n betoging in Grabouw oor oorbevolking by ‘n plaaslike skool.

Die DA het die blaam verskuif na die departement van openbare werke se voortdurende vertraging wat die goedkeur betref van alternatiewe grond om skoolgeboue in die gebied te bou.

“Zille se rassistiese stelling bewys die DA se beleid van uitsluiting van swartes,” het Jackson gesê.

“Sy sal nooit dieselfde ding sê oor wittes wat van ‘n ander gebied in die land na die Wes-Kaap trek, of selfs mense wat van ander lande na die Wes-Kaap trek nie.

“Om Suid-Afrikaners wat vrye beweging in hul eie land het as vlugtelinge te beskryf, is dieselfde as om hulle as buitelanders te etiketteer,” het Mthembu gesê.

Toe sy Dinsdag deur ‘n Twitter-gebruiker gevra is om ‘n “vlugteling” te definieer, het Zille geantwoord: “Vlugtelinge is mense wat moet ontsnap omdat hulle regte geskend word. Dit beskryf Oos-Kaapse leerlinge presies.”

Mthembu het gesê die DA beskou swartes as nuttige kiesers om verkiesings mee te wen en niks anders nie.

“Ons doen ‘n beroep op alle swart DA-lede om die DA te sien vir wat dit is – ‘n wit, rassistiese party,” het hy gesê.

“Ons doen ook ‘n beroep op al daardie swartes wat in die leierskapstrukture van die DA is vir uiterlike vertoon om uit die DA te bedank.”

- Volg Nuus24 op Twitter
 
SAPA
Lees meer oor:    helen zille jackson mthembu
«Terug